Vodafone ka punuar për të përshtatur plotësisht kushtet e kontratës me kërkesat e Rregullores për Mbrojtjen e Konsumatorit.
Ndryshimet specifike varen nga momenti kur ju keni nënshkruar kontratën, pasi procesi i përshtatjes është zhvilluar në mënyrë të vazhdueshme ndër vite, dhe për këtë arsye kontrata është përditësuar në periudha të ndryshme. Ju ftojmë të lexoni kontratën e plotë; megjithatë, në çdo rast, ndryshimet që vijnë si rezultat i rregullores kanë për qëllim sigurimin e transparencës dhe mbrojtjen e konsumatorit.

Përditësimi i nenit 5 – ndikimi i inflacionit
Gjithashtu, neni 5 është përditësuar për të pasqyruar ndikimin e inflacionit në shërbimet e komunikimeve elektronike. Duke marrë parasysh efektin e inflacionit në çmimet e të gjitha produkteve dhe shërbimeve bazë (energji elektrike, karburante, etj.), dhe për të rritur transparencën në marrëdhënien me konsumatorin, termat dhe kushtet e kontratës në nenin 5 tashmë përcaktojnë mënyrën se si inflacioni do të ndikojë në çmimet e shërbimeve të komunikimeve elektronike në vitet në vazhdim.

Për këtë arsye, ju ftojmë të lexoni parashikimet e nenit 5 të kontratës si dhe Pyetjet e shpeshta më poshtë, e përgatitur për të dhënë më shumë informacion për konsumatorët.

Përputhshmëria me Rregulloren nr. 49, datë 11.03.2021 “Për Mbrojtjen e Konsumatorëve dhe Pajtimtarëve të Shërbimeve të Komunikimeve Elektronike Publike”

Vodafone është e përkushtuar të ofrojë përvojën më të mirë për klientët e saj duke siguruar shërbim të pandërprerë në përputhje me rregullat e Autoritetit Rregullator në fushën e telekomunikacionit.
Me vendimin nr. 2, datë 11.03.2021, AKEP ka miratuar Rregulloren “Për Mbrojtjen e Konsumatorëve dhe Pajtimtarëve të Shërbimeve të Komunikimeve Elektronike Publike”. Vodafone ka punuar në mënyrë të vazhdueshme për të zbatuar kërkesat e kësaj rregulloreje në të gjitha proceset e punës.

Ky akt rregullator synon të sigurojë një mbrojtje më efektive për konsumatorët dhe pajtimtarët e shërbimeve publike të komunikimeve elektronike përmes përcaktimit të rregullave më të qarta që lidhen me të drejtat e pajtimtarëve në marrëdhëniet e tyre me operatorët, përfshirë:

• Kushtet për transparencën dhe publikimin e informacionit nga ofruesit e rrjeteve/shërbimeve publike të komunikimeve elektronike;

• Rregulla të qarta për aksesin në shërbimet e emergjencës dhe përcjelljen e informacionit mbi vendndodhjen e pajtimtarit për këto thirrje, përfshirë thirrjet drejt numrit unik të emergjencave 112;

• Detyrime të qarta për termat dhe kushtet që duhet të përfshihen dhe të jenë pjesë përbërëse e kontratave të pajtimit për ofrimin e rrjeteve dhe/ose shërbimeve publike të komunikimeve elektronike;

• Saktësime mbi kohëzgjatjen, rinovimin dhe përfundimin e kontratave;

• Rregulla mbi sistemin e faturimit dhe saktësinë e tij;

• Masa për të garantuar akses të barabartë për personat me aftësi të kufizuara, në përputhje me nenin 151/1 të Ligjit nr. 54/2024;

• Rregulla më të qarta për trajtimin e ankesave nga operatorët, mbajtjen e regjistrave të tyre dhe zgjidhjen e mosmarrëveshjeve mes pajtimtarit dhe operatorit.

Për më shumë informacion, vizitoni Rregullore Nr.49, datë 11.03.2021 – Për mbrojtjen e konsumatorit dhe pajtimtarit të komunikimeve elektronike publike (akep.al) në faqen zyrtare të AKEP, si dhe Termat & Kushtet e Përgjithshme të Pajtimtarit të përditësuara.